دا كلام منطقي يا فجراوي و أقرب للحقيقة .. لكن على قول أهلنا ( بيعفن و ينشم ) و نفس النويسين القعدوا حبكوا و نسجوا و قاموا بتأليف هذه الروايات بكرة يجوا يفندوها بند بند - مشهد مشهد - زنقة زنقة .
أمس اتصلت علي واحدة من عنديكم و شبكتني ( وس وس وس ) و حروف الإنقليسي ديل أصلها أكلتهن و عدمتهن الحبايي و انا شابكها ليك وط وط؟ الواطة التكيلك .. قالت انت علي محي الدين ؟؟ قت لها ايي بلحييييل .. قالت لي مطلوب منك بعض البيانات ..
- أي في شنو آ خرابة ؟
نعل ماني مطلوب بعد بن لادن ؟
و أنا بتذكر في فعايل السي آي أيه و ال أف بي آي
أمريكان في كل مكان
ديل مالين الدنيا ملي
ديل قالين الخلق قلي
- قالت لي مطلوب رقم البطاقة عشان نكمل معلوماتك في برنامج اللوتري بروقرام ..
شلت نفسي و ختيتو و قت لها لاااااااااا ها اله الا الله محمداً رسول الله
العقرب التاكلك و تاكل ناس اللوتري و تغشى فجراوي ذاتو
آ خرابا مي قطعتي قلبي المولى ياذاكِ ..
قت لها سمح بجهز الرقم و أديك خبر ..
قفلت التلفون و البطان مطيرين عيونهم و يعاينوا لي ..
واحد سألني .. يا بابا أنت بتتكلم يمني ؟؟
قلت له أريتو ان كان يمني ..
البت دايري تحفر لنا حفرة تاني و جووووه في الحفرة الواقعين فيها دي ..
بسسسسسسسسسم الله .
الرئيسية 
