القعونجي المابيي تمشي

ياها دي الضفدعة المابية تمشي
كل ما نخش الموقع نلقاها قاعدي متحكري كانو البكان هيلها
شوفولنا قصتها شنو

القعونجي دي ما براها
في حد اتلوّم معاها ؟؟
يمكن اتطاول شتاها
و البيات عكّر صفاها
راجية غيمات الخريف يملِن سماها
و المطيرة المشتهنَّها مشتهاها
و زيّ ما بنرجى الليالي الحلوة يتعطّر سماها
برضو زيَّنا في رجاها
..
ود مدير ؛؛ بكرة الخريف يملا الحفير
و بكره ياما الدنيا تحلى .. و نلبس الديباج حرير
و ندلق النسمات يقشَّن يمسحن ألم الهجير
و اليباس الفوقنا يختانا و يطير
و القعونجي الواحدي تتوالد كتير
و تملا كل الأرض ضجة .. و السماوات بالهدير
..
ود مدير لا تبدا تطمع
المحل شايلنا و اوسع
لو النفوس اتطايبن .. التَّلَكِّي يشيلُّو أربع
و القعونجي بتلقى مرتع
و يكفي للجايين وراها
و منتدانا الحلو يصبح منتداها
القعونجي دي مابراها
ما في زول - بالله - يتلوَّم معاها
و نحن شِن حارسين بلاها ؟؟
ياها قمراتنا المنوِّري في سماها

التَّلَكِّي : قطعة من جذع الشجرة ( حراز غالباً ) يستخدم كمقعد صغير في المطبخ للعواسة و أحياناً يوضع و يكسَّر عليه اللحم بالفرار أو الساطور .

يوسف مدير كتب:

ياها دي الضفدعة المابية تمشي
كل ما نخش الموقع نلقاها قاعدي متحكري كانو البكان هيلها
شوفولنا قصتها شنو

!!

الحمد لله طفشت القعونجي المابيي تمشي ونزل المطر وبردالجو والصفحة الرئيسية عادت كما كانت ونشكر الريس كتييييييييييييير على المجهودات العظيمة وربنا يسترنا معاك.

ممكن من هنا نرفعلك يا ريس التمام
مافيش قعوية ولا حتى فردة حمام
لا في بِس ولا جدادة ولا نعام
ولا ككو لا هوْ هوْ ولا بعام

القعويي الجاتنا زايرى كان من المفروض نقابلا بى حفاوة
للاسف أخوانا واخواتنا العزاز ما لقت فيهم غير جفاوة
الجميع فى موقعنا ده كان بيهتف بى رحيلا وليهو اتختت علاوة
انحنا ديمى بى تسرع حكمنا بكون قاسى جد ولى ظلمنا مافى حد
لأنو نحكم بى عداوة
ود مدير قالا صريحة القعويي لازم نزيحة وفى البكان الساكنة فيهو
لونخت بس قطعةصفيحة!!
والريس فجراوى يجزم انها ضفدع جاسوسة
دى جايى من الحيكومة وفى منتدانا مدسوسة
الخيانة عليها باينى والدلايل ماب نكوسة
الحكم يصدر عليهافى ثوانى وبالجزم لازم ندوسة
اب شنب(ياسر)يحلف ويأكد انها جاسوسة صهيونية
ارسلتها الحكومة الاسرائيلية بالتعاون مع الادارة الأمريكية
للقيام بثورة شعبية واسقاط الحكومة الاسلامية.. وبيقول فى ختام مرافعتو بلدنا ماب تحمل ثورات... بلدنا تانى فضل فيها مليون كيلو متر مربع بس..ولو حصلت ثورة الآن ما اظن يفضل فيها مليون
متر...ولو ضرورى بلدنا تتقسم نقسما بى عدالة وفى سلام...الا الوحدة أفضل والقعونجى لازم ترحل شان البلد تكون امان..
المديرة أوشين بتحلف انهو القعونجى دى هى فايروس
ولمملمت كل المضادات شى كاسبر وافيرا وللافاست كانت تكوس
ثم جمعت كم صواريخ ومدافع وقنابل وللصفوف كانت ترص
وأعلنت حالة طوارى وقفلت كل الكبارى وأطلقت صافرات انذار توالى

والله القعويه ماقصرت
اظهرت لينا مواهيب عديده
ودكحيل ود مدير
وقبلهم سكوتي
كل واحد نظم ليهو قصيده فيها
كاني كدي النجيبا راجعي

بعد العودة من الاجازة الاجبارية اصدرنا الاتي وعلى الجميع التنفيذ الفوري والافادة:
1/ عمل نسخة من هذه القعونجي لكل عضو كتذكار.
2/ ممنوع استخدام الصورة كتوقيع الا بعد الرجوع لحضرتنا وبطلب رسمي معنون الى السيدة المديرة بواسطة السيد مؤسس الموقع.
3/ كل من يخالف سيوقع نفسه في شر اعمالو.

صدر تحت توقيعي وختمي بتاريخ اليوم

القعونجى ...ياحليلا....الخلت الموقع ظلام
دى لما كانت بينا كان واجهتنا حاجة تمام
الا اسلطو عليها ..........................م