جوهرة الشباب إنتي
ورداً نادي....... ومشتي
بي ألوانك......... بهرتي
وبي أنوارك...... جهرتي
وزي المارشال ظهرتي
من صيد الوادي... إنتي
هبلتيني......... وجفلتي
*****
الفي قلبي.... مطبوعه
شتيلة منقة.... مزروعه
صغيره ولينات... فروعه
سألت غفيره من نوعه
قال لي.... ليك ممنوعه
والخوه معاك مقطوعه
*****
قصيبة.... لفت الجزيره
خدره وقاسي تفسيرها
ودايماً... غضبان غفيرها
يلاقي الناس.. بتكشيرها
بفكر...... ألف تفكيره
وبقوم أفتح معا السيره
*****
المحجور.........إذن صرفو
خدار متاكي... في جرفو
ياء الكية ..........من حرفو
وحاجبو هلال كحيل طرفو
كل العشاق.......... يغرفو
ويشربوا .. من بحر وصفو
*****
في الحِلّه .... الدوام حافلة
باقوم لها ....أسبق القافلة
ولي الله بصلي في النافلة
ألقاك ........في دلال رافلة
وبعيد رامي الهدم... غافلة
يا صيدة الخلا .......الجافلة
*****
سلام يا الكوكب... الضاوي
وسلام يا الفرع ....المناوي
وسلام يا أم حباً ...سماوي
حبك لي جسمي.. شاوي
ومألِم في القلب..... كاوي
وشُفتِك ليّ.......... بتداوي
*****
تعال أسمع ليْ....... روايه
وشوف السبب......... أذايا
جميلة جماله..........للغايه
وعظيمة ......ومخلوقة آيه
فريع مشتول ....بي عنايه
فرهد وقام في... الحصايه
*****
حبِّك فوق........ من العادة
وجمالك راجح......... زيادة
ولو كان خلُّوكِ........ سادة
تعطلي ناس في .. العبادة
فُصوده من النور ....مداده
وتطمِّع فيها........ حساده
*****
آه يا زهر ............الحديقه
النجفة الضوّت....... فريقه
حمامة الجبل .....الطليقة
مشيتك قاسي.... تطبيقه
وزي نغمات ......الموسيقه
وحرقتي العُشاق حريقه
*****
آه انا ديمه......... في أنّه
ومنك ما يقولوا .......جَنّه
إنت رمان منو....... أزمنا
جديد ما قام عند أهلنا
وجايبو ملاك ...من الجَنّة
وبروح لي أمو.... تتمني
*****
شبه الريل ...في خلاهو
وشبه الوزّ... في مياهو
وانا المكتول بي هواهو
ومن لونو ....ومن نداهو
بديع ماب أقدر ....غناهو
دايماً أكتبو ....وأنساهو
*****
خلاص خليتو ..... ميدانك
انا المارِضْني....... رُمانك
ومعلِّقه روحي.. طيقانك
وشايته مزاجي سيقانك
ومحير عقلي.... لمعانك
وتسريح شعرك ودهانك
----
الشاعر
خضر محمود سيد أحمد
الرئيسية 
