الشعراء .. علاقات حميمة مع الطيور ؛؛ و عداوات قيمة مع الحراس !!

بين الشعراء و الطيور حميمية قديمة و وفاء و ود .. فهي رسل الغرام عندهم ( و مرسال الحبيب حبيب ) و حافظة أسرارهم .. يتباكون لهديل اليمام و يهيج فيهم كوامن الشوق و يشبهون حالهم بحال الطيور دائماً و إن كانوا يرونها تستطيع - بما تملك من أجنحة - أن تطير الى حيث تشاء لا يكبلها ما يكبلهم و في ذلك قال قائلهم :
أسرب القطا هل من يعير جناحه .. لعلي الى من قد هويت أطير
أما الشاعر اسماعيل حسن فقد وجد في طير الرهو خير شبيه في الحال ( الغربة والمسكنة ) و لكنه عاد و رأى أن الرهو أحسن حالاً منه بل تمنى لو صار مثله فوقف عاجزاً متحسراً على حاله بعد ان مل ( عيشة التراب على قوله ) .. مبهوراً بطير الرهو الذي يحلق حيث شاء و يتخير من الأجواء مايريد :

والله والله يا طير الرهو
قسماً عديل ما فيهو لو
دمع الحبايب زى دموع الساريه
في الوادي البعيد بتسوي جو

والله يا طير الرهو
ما كت مصدق اني بلقاك يارهو
اشكو ليك من جور زماني كيف رماني
شوف وراك
شوف الزمن كيفن بسو
حتى باقي الزاد كمل والليل طويل
طولاً غريب ما فيه ضو
والريح تنوح فوق الدروب
وا خوفي من صوت الرياح
وكتين تنوح وتسوي او

زيك غريب و الغربة طالت يا مسيكين
متلي يا طير الرهو
التراب ملينا عيشته
واريتني زيك كل يوم يحضني جو
في بحور الريد نسافر
والمراكب كاسحة..ما دام ريحنا نو
نمشي لي أرض الحبايب يا حلاتن
في الدغيش والدنيا ضو

يا سلام لما نسالم
نبقى شوق طاير معربد
نستحيل شلال عواطف
في قليب عاشق .مغرد
زي تميرا في الشمال
لمن يفيض النيل يفرهد
تنتشي الدنيا وتزغرد
و النسيمة الحلوة تسبقنا
وتنقر بابنا كو.. كو


يا سلااااام قصيدة تفتح الروح ضلفتين .. كدي نقيف في ( كو .. كو ) دي .. لامن نجيها تاني ..

.ثوري مشاركه مكرره ابت تحذف
.............

أوشين كتب:

موضوع جميل جداً

غني ياطيور
كلمات علي محمود التنقاري ...


غني يا طيور نغمك الحنون يشرح الصدور ... غني
غني .. غني يا طيور غني
وغني يا طيور روضك النضير يبعث السرور
غني .. غني يا طيور غني
غني يا طيور حولك الورود فتحت زهور
غني .. غني يا طيور غني
فتحت ثقور من ضياءها نور زي صدى البدور
غني .. غني يا طيور غني
الربيع . .. الربيع .. الربيع ... يزيد الرياض جمال
ويمنح النفوس قوة احتمال
نسائم الشمال ... الشمال .. للجنوب ... تزور
غني .. غني يا طيور غني
------------
الربيع . .. الربيع .. الربيع ... يزيد الرياض جمال
ويمنح النفوس قوة احتمال
نسائم الشمال ... الشمال .. للجنوب ... تزور غني
غني .. غني يا طيور غني
غني .. غني يا طيور غني
غني .. غني يا طيور غني

شكراااان أوشين على هذه المساهمة القيمة ..
هذه الصورة التي رسمها الشاعر توحي بجمال آسر للطبيعة بفصل الربيع بأزهاره و جداوله المنسابة و طيوره الغناء .. ذكرتني جنة الأطفال و دنيتنا الجميلة بالوانها الزاهية بالورود و ملابس الأطفال الملونة .

عابره كتب:

من القصائد المعبره جدآ لعلاقه الطير بشعرائنا
ودائمآ احب الاستماع اليها
لان بها بعض العبارات التى تتعجب عند سماعها
لمن يقول ولو تعب منك جناح
فى السرعه زيد
يعنى ما قال ليهو ارتاح شويه وواصل تانى
قال ليهو فى السرعه زيد

الطيـر المهاجـر
صـلاح أحمد إبراهيـم




غريب ..
وحيد في غربتو
حيران ..
يكفكف دمعتو
حزنان..
يغالب لوعتو
ويتمنى
بس لي أوبتو
طال بيه الحنين
فاض بيه الشجن
واقف يردد ..
من زمن
بالله يا الطير المهاجر للوطن
زمن الخريف
تطير بإسراع
ما تضيع زمن
أوعك تقيف
وتواصل
الليلة
للصباح
تحت المطر
وسط الرياح
وكان تعب منك جناح
في السرعة زيد
في بلادنا ترتاح
ضل الدليب أريح سكن
فوت بلاد وسيب بلاد
وإن جيت بلاد
وتلقى فيها النيل
بيلمع في الظلام
زي سيف مجوهر
بالنجوم من غير نظام
تنزل هناك وتحيي
يا طير باحترام
وتقول سلام
وتعيد سلام
على ..
نيل بلادنا
وشباب بلادنا
ونخيل بلادنا
بالله يا طير
قبل ما تشرب
تمر على بيت صغير
من بابه ومن شباكه
بلمع ألف نور
وتلقى الحبيبة بتشتغل
منديل حرير
لحبيب بعيد
تقيف لديها
وتبوس إيديها
وانقل إليها
وفاي ليها
وحبي الأكيد

نعم عابرة فأغنية الطير المهاجر خير نموذج لعلاقة الشعراء بالطير و هي أغنية معبرة جداً و مليئة بالشوق الدفاق للوطن خاصة اذا أخذنا خلفية أن شاعرها الراحل صلاح أحمد ابراهيم كتبها في أواخر أيامه و في قمة شوقه للوطن الذي لم يكن فراقه له باختياره فبكى و أبكى بهذه القصيدة التي سبقت جثمانه للوطن - إذ كانت وصيته أن يدفن في السودان .. صارت سلوى لكل مهاجر بعيد عن وطنه بل حتى أخذ المغتربون لقب الطير المهاجر نفسه من الأغنية ..

شكراً على الإطلالة البهية و منتظرين البقية ..

يوسف مدير كتب:

نقطة نظام يا ابعلوة وين الجانب التاني من العنوان (عداوات قديمة مع الحراس)؟؟؟ خليتنا عايمين زي طير الصعيد
يا جمااااااااااااااااااااعة ما تخمونا بالطيور وتنسونا باقي الموضوع

ود مدير يا لماح .. الجانب الثاني من العنوان كلمة ( قديمة ) كتبت خطأ في العنوان لكن لم تفت على نباهة ود مدير .. عارف المذيعين المصريين في الكورة لما تعجبهم لعبة حلوة من اللاعب يقولوا ( يا وله يا وله يا لعِّيب ) .. و نحن هنا بالفعل نشجع لعبتك الحلوة .

نعم الشعر السوداني عامة و الشايقي مليء بالعداوات بين الشعراء و الحراس .. و الحراس يؤدون واجبهم في حماية المحروس و هذا يتطلب اليقظة و الحذر و التصدي لكل من تسول له نفسه العبث بالمحروس و هذا التصدي و الحذر ينظر له الشاعر من الزاوية التي تليه و يصوره كنوع من اللآمة و القطامة ان لم تكن ضرباً من الشقاوة و ربما رموه باللعنة و التي هي الطرد من رحمة الله ( حتّة واحدة )
حراســك شقي و ملعون
ما بيضحك يفِرله سنون
و من قولة سلام مغبون

و حسبك من شخص مغبون من رد السلام .. فما الذي يمكن أن تجده من شخص يضن حتى بالرد على السلام .
و في ذلك يقول آخر :
ما بيخاتر الطير في الفرع
لكّي و أبكم يوم مــا سمع
و إن رقد يرقد مكــــوع

لِكِّي يعني ( مافي مفاهمة ) و أبكم ( كلام نهي ) و كمان لا يسمع .. حتى الطير في الفرع متسلط عليه .. متيقظ و منتبه دائماً و حتى إن رقد ( لو حدث و دا نادراً ما يحدث ) تجده متكئاً ( مكوع ) ليتمكن من المراقبة و يكون على أهبة الإستعداد .

و نواصل ...

يقول أحد شعراء بني شايق :

مرة ليـها مشيت زيارة
عاكسوني اهل الغفارة
قالوا زي شوفتك خسارة
ياخي سيبنا بلا عوارة

و أهل الغفارة تعني أهل الحراسة زي ما يقولوا أهلنا المصريين ( شيخ الغفر و رجالته ) .. الأبيات فيها شي من التحقير الذي يصب في خانة تعظيم مكانة المحروس في قوله ( قالوا لي شوفتك خسارة ) يعني مضيعة للوقت و ( درادر ساكت ) ثم أردف بعبارة أخرى ( أمسخ من الترمس )في قوله ( يلا سيبنا بلا عوارة ) يعني ورينا عرض أكتافك و مطرود عدييييل اختانا !!

أما الآخر فقد جعل الحراس من الإنس و الجن ( عديل ) :

نقلة بانة فاتحة زهورا
دق مع الفجر بـــابورا
بالجن والانس مغفــــورة
ممنوع حد يلمس ســــورا

دق مع الفجر بابورا .. ترادف قول ود الدابي ( فجر بابورو دوّر ساق ) و بالجن و الإنس مغفورة يعني محروسة .. و ممنوع حد يلمس سورا تعني ممنوع اللمس .. لكن حراسة الجن دي ما عارف الا تكون شجرة البان دي مسكونة ( اسم الله و ذكر الله ) ..

أما النعام آدم في أغنية المنقة المنقولة كان يقول :

شديرة منقة مزروعة
خدرا ولينات فروعا
سألت غفيرا من نوعا
قال لي دي حاجة ممنوعة
والخوة معاك مقطوعة

قال لي دي حاجة ممنوعة .. و الخوة معاك مقطوعة ؛ دا قطع العشم و قفل باب الرجاء بالضبة و المفتاح ..

أما حارس تمير المشرق فقد بلغ أقصى حدود القسوة و الوحشية ( و الغتاتة ) عنداستعماله آلة ( الفَرَّار) في تفريق ( المتظاهرين سلمياً ) حين وصفه الشاعر و قال :

تمير المشـــرق البشَّيــل مفدَّع
الغتيت حراسو بي فرارو يجدع

كتب حافظ عباس

والله نحنّ مع الطيور..

الما بتعرف ليها خرطة

ولا فى إيدا جواز سفر

نمشى فى كل المدائن

نبنى عشنا بالغناوى

.. وننثر الأفراح .. درر

والربيع يسكن جوارنا

والسنابل تملا دارنا

والرياحين .. والمطر

*********

والحبيبة تغنى لينا

لا هموم تسكن دروبنا

.. ولا يلاقينا الخطر

*********

إلاّ باكر يا حليوة

لمـّا أولادنا السمر

يبقوا أفراحنا البنمسح بيها .. أحزان الزمن

نمشى فى كل الدروب الواسعة .. ديك

والرواكيب الصغيرة .. تبقى أكبر من مدن

إيدى فى إيدك نغنى

والله نحنّ .. مع الطيور

الما بتعرف ليها خرطة

ولا فى إيدا جواز سفر

العصافير هي اجمل الطيور
وشاعرنا اسحق الحلنقي خرج بهذه الرائعة ونرجو من كل العصافير المهاجرة الا تزرف الدموع من هذه الكلمات التي تدخل القلب مباشرة

هـجرة عـصافير الـخريف
فـى مـوسم الـشوق الحلو
هـيج رحـيلا مـع الـغروب
احـساس غـلبنى اتـحملو
وكتمت اشواق الحنـيـن
داير الدموع يتـقـلـو
ورجعـت خليت الـدموع
يـنسابو ..مـنى ويـنزلو
ليـه يا عصافيـر الخريف
خضرة مـشاعـرى اشيلا صيف

تـحت الـغمام شـايف
مـواكب الـهجرة اتـلاشت سراع
ليه يـا عـصافير ليه الاسف
مين علمك أسف الوداع
وعارف دا ما اول سفر
لبلاد بـعيدة بـدون مـتاع
زى ما بتخافي مـن الرياح
بنخاف كمان انحن الضياع
ليه يا عصافير ليه الضنى
صفقة جناحك احزنها

غـايـب الـسنين الـليله
مالو غنا العصافير غـلبو
طراهو زولا كان ولوف
كم رضا خاطرو وطيبو
سمع قليبو كـلام حـنين
هـدهد مـشاعرو ودوبـو
الـناس سعيدم فى الـحياة
لا ضاق فراق لا جربو
وانا حالى فى بعد الوطن
دفـعنى ضي العين تمن

من صره جبينك طرز البوابى وين خليت لئامتك يالقبيح متشابى --كبسة فينا بى غفله ام سبيبا كابى سوة لينا كتل المنخلع للدابى---------( مجموعه فى زياره لمستشفى منعو من الدخول -وفجأة ظهرة هذه الجميله وفتحة الابواب وجاده قريحة الشاعر بهذه الابيات

شكراً .. مدير - أوشين - عابرة
على المرور المعتق و المساهمات الثرة
و كل الود ..

محمود ادريس محمد على كتب:

من صره جبينك طرز البوابى وين خليت لئامتك يالقبيح متشابى --كبسة فينا بى غفله ام سبيبا كابى سوة لينا كتل المنخلع للدابى---------( مجموعه فى زياره لمستشفى منعو من الدخول -وفجأة ظهرة هذه الجميله وفتحة الابواب وجاده قريحة الشاعر بهذه الابيات

أها دا الكيل بالمكيالين ذاااتو و مسك العصاة من نصها و الخيار و الفقوس .

الظاهر يتم اختيار الحراس و خاصة بوابي المستشفيات من أكثر الناس لآمة و قطامة و أكثر الوجوه اكفهراراً - ليتناسب وضعه مع طبيعة العمل و يصمد على الحاح الزوار و ترجي الزائرات بالذات - واحد عربي ( قطيم ) وقفت أمامه مجموعة من النساء تحمل كل واحدة في يدها عمود مليء بالأكل .. و تنهال عليه ( التحانيس ) من شاكلة يا ولدي الله يرضى عليك - يا ولدي نحن جايين من أم بده - يا ولدي المواصلات مافي .. و يسكت مدة طويلة و كأنه يبحث عن رد ماسخ ليرد به .. فيسأل بعد صمت طويل : بالله انتو من أم بده ؟ فتتهلل أساريرهن لنجاح المحاولة - فيردف قائلاً في برود و لآمة : أم بده محل ببيعوا الموية و الكسرة ؟ و الله الليلة ما تدخلن .
أما الاخ الجنوبي الذي كان يعمل بواباً للمستشفي فلم يستطع الصمود أمام الحاح النساء و الرجاء المتواصل ففتح الباب قائلاً : ( يلا ادخلوا .. كرهتونا التِّبْ ساتو ) يقصد الطب .

تفتحت قرائح كثير من الشعراء عند بوابات المستشفى و نظموا الكثير من الشعر و سكبوا الدمع سخياً ثم انصرفوا وهم يلعنون الحراس و يصفونهم باللآمة أحياناً و بالقبح تارة أخرى كما ورد في أبيات المحمود أخوي :
من صرة جبينك طرز البوابي
وين خليت لآمتك يا القبيح متشابي
كبست فينا بي غفلة أم سبيباً كابي
سوت لينا كتل المنخلع للدابي
الظاهر أن الحارس نسى كل لآمته و قام متشابي لفتح الباب ( الله يخربك ) و أم سبيباً كابي أخذتهم على حين غفلة مما يصعب معه تلافي الخطر .. أما سوت لينا كتل المنخلع للدابي - ففيه اشارة للضربة القوية أو ما نسميها ( ضربة خوف ) فهي ضربة قاضية و الله المستعان .

و من أشعار بوابات المستشفيات أغنية النعام آدم :
يا عيوني كفاكن دموع
قالوا شوف ناس آسيا ممنوع
..
آسيا من البال ما بتغيب
و النفوس غيرك ما بتطيب
عودا زي الغصن الرطيب
و الحديث أحلى من الزبيب
..
من جبينه بيشلع النور
الخدود باقات من زهور
يا الغفير اسمح لى مشكور
بالدخول ...واطلب ما تدور ( نظام رشوه و كدا )



قال لى وقت الشوف انتهى
الزيارة ده ما وقتها
بالدخول الدكتور نهى
قلبى وين تلقى الردتها ؟؟

و قالوا شوف ناس آسيا ممنوع