أوعك تغيب يا طيف
من كلمات الشاعر : السر عثمان الطيب
يا طيفه صابحني
بالله ماسيني
أوعك تغيب يا طيف
فد لحظه عن عيني
أسكن مسارب الدم
بينات شراييني
شاركني في الأنفاس
أكتلني وأحييني
مجروح فراقه عليل
طببني آسيني
لازمني ليل ونهار
هجدني نسيني
،،،،،،،،،،،،
يا طيفا عيش وأياي
في سري في بوحي
زي ما هي عايشة معاي
عصفوره في دوحي
غنت غناها صداي
شجني وتباريحي
أنساها كيف يا طيف
حتى أن نسيت روحي
،،،،،،،،،،،،
الفي عيونا لقيت
آمالي وأحلامي
وقدت مشاعل الضي
في دربي قدامي
شالت معاي الهم
أحزاني وآلامي
صبحت منابع الهام
الحاني وأنغامي
،،،،،،،،،،
حالتنا دابو الريد
بادنو مشوارو
راجنو عمرو يطول
تتفتح أزهارو
لكن زمانا المر
جارتبنا أقدارو
ليل الهناء المأمول
ينفضو سمارو
،،،،،،،،،،
هجمت خطي الأيام
قاصدانا فراقه
تتلصص الأقدار
للفرحه سراقه
صالاني نار البين
في جوفي حراقه
في الدنيا لو عايشين
لا بد نتلاقي
،،،،،،،،،،
يوم الوداع الحار
فضحني دماعي
أبكي وأنوح بالبي
بالحولي ما واعي
تتضاعف الأحزان
وتزود أوجاعي
همست لي قالت لي
ودعتك الراعي
،،،،،،،،،
خلتني في حال زول
ضهبان فقد دارو
كالقمري طاش والريح
عصفت بأوكارو
معقول يرن طمبور
هجرنو أوتارو
والنهر هل بيسير
يوم عكس تيارو
،،،،،،،،،،
يا طيفا إنت عزاي
في محنتي القاسي
قاسمني سهد الليل
وأشرب معاي كاسي
ياكا المعاي فضل
سلواي وإيناسي
داخرك وجيع ورفيق
وشاهد علي إحساسي
...................................................
الرئيسية 